Dadlı çayın hazırlanması. MƏSLƏHƏTLƏR

Quru çay ev şəraitində kip bağlanan şüşə və ya keramika qablarında saxlanılmalıdır.

Çayı sərin, quru, təmiz, qaranlıq və havası tez dəyişilən yerdə saxlayırlar.

Dadlı çay hazırlamaq sizin fikirləşdiyiniz kimi, o qədər də asan iş deyil. Ancaq bütün qaydalara əməl etdiyiniz halda siz həqiqətən dadlı, ətirli, faydalı və insanı gümrah edən çay hazırlaya bilərsiniz.

Dadlı və ləzzətli çay üçün təmiz və yumşaq su lazımdır. Su coddursa, onu bir gün ərzində evdə bir qabda saxladıqdan sonra filtrdən keçirtmək lazımdır. Suyu üzərinə çoxlu ağ qovuqcuqlar çıxana kimi dəmir çaydanda qaynadırlar. Su çox qaynadıqda çayın dadı olmur. Çayı dəmləyərkən bir neçə dəfə qaynadılmış sudan istifadə etmək tövsiyə edilmir.

Çayı yalnız saxsı və ya çini dəm çaydanında dəmləmək lazımdır.

Boş dəm çaydanını 3-4 dəfə qaynar su ilə yaxalayın. Su üzərində qovuqcuqlar əmələ gələnə qədər qaynadıqdan sonra dəm çaydanına hər stəkan üçün bir çay qaşığı quru çay olmaqla quru çay töküb yarıya qədər su əlavə edin. Sonra dərhal çaydanın ağzını qapaqla bağlayıb üstünü dəsmalla örtün. Nəzərə alın ki, çay dəmləyərkən dəm çaydanını isti qaz plitəsinin üzərinə qoymaq olmaz.

Çay 5 dəqiqə ərzində dəmləndikdən sonra, çaydana axıra kimi qaynar su tökün. Əgər çayın üzərində köpüklər əmələ gəlibsə, deməli, çay düzgün dəmlənilıb.

Çayı dərhal fincanlara süzün və təzə halda için. Çayı dəmləndikdən sonra 1 saat ərzində içmək olar. Köhnədən və xüsusilə də gecədən səhərə qalmış çayı içməyin – bu səhhətiniz üçün ziyanlı ola bilər.

Evdarliq.Az