Dadlı ətin bişirilməsi qaydaları. Faydalı məsləhətlər

- Ət soyuq suda yuyulur, ancaq suda çox saxlamaq məsləhət görülmür.

- Əti taxta üzərində çox saxlamayın, çünki taxta ətin şirəsini özünə çəkir. Əti doğramazdan əvvəl taxtanı soyuq su ilə isladın ki, quru taxta ətin şirəsini özunə çəkməsin.

- Əti bişirərkən yaxşı bulyon almaq istəyirsinizsə - soyuq suya, ətin özünün dadlı olmasını istəyirsinizsə - isti suya salın. Əgər 1 litr bulyona 1 xörək qaşığı limon turşusu əlavə olunsa, onda ət daha yumşaq və dadlı olar. Bişmiş əti bulyonun içində saxlayıb qazanın qapağını örtsəniz, o daha ləzzətli olar.

- Qoca mal ətinin tez bişməsi üçün onu əvvəlcədən xardal ilə sürtün, bişirməmişdən 2 saat qabaq isə soyuq su ilə yuyun.

- Bişmiş ətdən başqa bir xörək də hazırlayacaqsınızsa, əti bütöv bişirin.

- Əti qızartmaqdan əvvəl duzlamayın, çünki duzda onun şirəsi çıxır, bu da ətin keyfiyyətini korlayır.

- Bişirmə zamanı ət tərkibində olan suyun xeyli miqdarını itirir və həcmdə təxminən 40%-ə qədər azalır. 1 kq çiy ətdən 600 q bişmiş ət çıxır. Qızartmada zamanı itki bir qədər az olur - 30-35%. Ət heyvanın növündən və yaşından asılı olaraq 40 dəqiqədən 3 saata kimi bişir.

- Çox vaxt zövqə görə duzlamağı məsləhət görürlər. Bununla belə, müəyyən norma var, 1 kq döyülmüş ətə 1 çay qaşığı, 1 litr supa 1/2 çay qaşığı duz tələb olunur.

- Əti süfrəyə verməyə az qalmış qızartmaq lazımdır.

- Ətin dadını və qidalı xüsusiyyətlərini saxlaması üçün onu dağ olmuş yağda, güclü odda 8-10 dəqiqə ərzində qızardın. Qızartmaqdan əvvəl əti hər iki tərəfdən xüsusi taxta çəkiclə yaxşı döyün.

- Qızarma zamanı ət tikələri bir-birinə toxunmamalıdır. Əgər siz böyük ət tikəsini qızardırsınızsa, hər 10-15 dəqiqədən bir onun üstünə ətdən çıxmış yağı, bulyonu və ya isti su tökün.

- Tavaya bir tikə qabıqlı limon qoyularsa, qızardılmış ət daha dadlı olar. Qızartmanın sonunda yumşalmış qabığı qaşıqla əzirlər və sonra sousla qarışdırırlar.

- Tavanın içinə bir az duz səpilsə, qızartma zamanı yağ sıçramaz.

- Döymə kotlet üçün əti tellərin əksinə kəsmək, mətbəx çəkici ilə döymək lazımdır.

- Dana ətindən hazırlanan əzmə kotletlərə tam vermək üçün onların üstünə qızartmaqdan qabaq xardal tozu səpmək lazımdır. Əgər qızartmaqdan 1-2 saat əvvəl bitoklara (yumru kotletlər) sirkə və günəbaxan yağının qarışığını çəksəniz onlar daha yumşaq olar.

- Kotletin yumşaq olmasını istəyirsinizsə, ətə qatılacaq çörəyi süddə isladın və sıxmadan ətə qatın.

- Əti necə pörtlətmək lazımdır ki, o, yumşaq və dadlı olsun? Əti soyuq su ilə yaxşı yuyun, bir az qurudun və isti çuqun qazanda dağ olmuş yağda bir az qızardın. Qızardanda çalışın çəngəl ilə ət tikələrini deşməyin ki, şirə çıxmasın. Sonra vam odda pörtlədin. Yağsız ətə növündən asılı olmayaraq yağ əlavə edin.

Vaxtaşırı ətin üstünə özündən çıxmış şirəni tökərək, onu zəif odda pörtlədin. Əgər ət cod qalıbsa, çuqun qazana 1 stəkan qaynanmış su, yaxud bulyon tökün və zəif odda pörtlətməni davam edin. Su qaynayıb azaldıqca onu əlavə edin. Əgər pörtləmə zamanı mal və qoyun ətinə bir xörək qaşığı sirkə əlavə olunsa onlar daha yumşaq olar.

- Qulyaşın, qovurmanın dadlı olması üçün süfrəyə vermədən qabaq, onları 20-30 dəqiqəliyə sobaya qoyun.

- Əti sobada bişirərkən, sobanı həddən artıq qızdırmaq olmaz, çünki ətin üstü yanar, içi isə bişməz.

- Sobada bişirilən əti hərdən soyuq su ilə isladıb, üstünə limon çəkdikdə daha dadlı olar.

 

 


Загрузка...
. .